3分鐘食勻荔枝窩－村里故事聲音導航-無論你係從馬料水定係沙頭角搭街渡入荔枝窩，落咗船後轉左就可以直入村廣場。廣場左邊係小瀛故事館，歡迎入內參觀。右邊係協天宮同小瀛學校。幸運嘅話星期六日有時會見到回流嘅村民英仔姐喺度賣汽水、茶粿， 都係一朝早就起身蒸架！一路向前行經過涼亭， 你會見到寫住紫氣東來嘅東門， 每個月既第一個星期六，荔枝窩會有農墟，復耕嘅社區農友都會喺度擺賣農產品同手作仔。入咗東門向左望就係華懋故事館、二伯士多同Foo’s cafe。二伯士多有豆腐花、公仔麵同汽水補給。隔離高咗一級係Foo’s cafe ，Anna 搜羅唔少本地食材，製作時令特飲同輕食。你仲有機會飲到荔枝窩咖啡同買手信， 例如隨意農樂有親手種同製作嘅香草護膚品，隱山有花茶有曲奇有時仲有文創產品， 永續實驗農場嘅各式天然醬料，自然管理協議嘅生態友善米等等。入咗東門沿住巷直行，故事館後面再後面， 就係好出名嘅花花雪條喇！呢度叫「自然空間」，仲有唔少自家種自家製嘅健康食品！天氣好嘅時候， 你仲有機會見到幾隻荔狗懶洋洋喺度曬太陽，靜靜地經過唔打擾佢哋就ok喇。想食客家菜？行前兩步啦，向左行到盡頭，見到啲戶外枱櫈就係明記茶座，我想推介春哥嘅(黃酒雞)同(雞粥)， 之前仲試過喺到打工換宿添～隔籬有個花園仔可以坐低抖下。而右邊嘅最盡頭係『的記』， 都係一班人點菜食飯嘅好地方，的哥唔係日日開，想試招牌（炆豬肉）最好打電話預訂咗先啦。行到攰又食到滯，去到最後一排屋嘅右邊，花園仔隔離有間小cafe叫荔林咖啡，樓上供應自家farm to table 嘅飲品同蛋糕，環境舒適。而去到左邊最入近長秀門花園仔對面，你會見到住咗一家3口， 推廣自然為本、綠色生活嘅綠續友倈， 唔止門口有得免費斟水，仲有自家製純素雪糕、洛神花刨冰等。如果你有一大班朋友入嚟荔枝窩，不妨打電話同群英姐預約，等群英茶座為大家度身訂造一餐鄉村住家菜！最後最後，如果覺得一日食唔曬所有美食？不妨book 定客家生活體驗村，留低過夜啦！